4.07.2017, 12:18
Қараулар: 212
Сарыптан сақтанайық!

Сарыптан сақтанайық!

Биыл ауданымызда сарып ауруына шалдыққан 1 адам тіркелді.  Сондықтан жануардан (ешкі, қой, сиыр) адамға жұғатын бұл қауіпті дерттен сақтанудың негізгі шаралары туралы толығырақ біле жүріңіз.

Малда сарып ауруы анықталған жағдайда міндетті түрде:

  • Ауру жануарларды 5 күннің ішінде союға тапсыру қажет және ескеретін жайт, оны үй жағдайында союға болмайды;
  • Мал қораны қидан, мал өнімдерінен тазарту, залалсыздандыру шарт;
  • Ауру жануар өлген жағдайда немесе түсік тастаса, ветеринар мамандарға хабарлау;
  • Жануарды күту барысында қорғаныш киімін кию (оны үйге кіргізбеу, әрі басқа киімдерден бөлек жуу), балаларға ауру жануарға жақындауға тыйым салу;
  • Жұмыс жасап болғаннан кейін  қолды ыссы сумен сабындап жуу қажет;
  • Мал тұрған қорада темекі тартуға, төлді кіргізуге және тексерілмеген малдың сүтінен жасалған тағамдарды қолдануға болмайды.

Адам сарып ауруын:

  • Мал төлдегенде жануардың шуынан, шудың суынан және жыныс жолдарынан бөлінген бөлінділерінен, сонымен қатар ауру жануардың зәрі, нәжісі, қаны, еті, жүні, терісінен;
  • Ауру жануардың қайнамаған сүтін және олардан дайындалған тағамдарды (қаймақ, кілегей, сүзбе, ірімшік, брынза және т.б.) қолданған кезде;
  • Шала піскен еттен;
  • Мал өнімдерін өндіргенде және тасымалдағанда;
  • Қырқым кезінде;
  • Бруцелла  қоздырғышы  бар шаңмен дем алғанда жұқтыруы мүмкін.

Бұл дерттің клиникалық симптомдары төмендегідей: науқастың дене қызуы 39-40 С-ға дейін көтерілуі, қалтырауы, түнгі мезгілде тершеңдік, жалпы әлсіздік, бас ауруы, сүйек, буын және бұлшық еттердің сыздауы, ұйқышылдық. Аурудың алғашқы белгілері байқалған кезде-ақ дәрігер көмегіне жүгініңіз.

«Сақтансаң, сақтармын» демекші, қай дерттен де сақтанудың кілті жеке гигиенаны ұстануда екендігін ұмыт қалдырмай, ауруға шалдықпаудың шарттарын орындайық.

Лаура КАРИНА,

аудандық қоғамдық денсаулық сақтау

 басқармасының бас маманы.

 

Жаңалықтар

Басқа да мақалалар