30.10.2020, 11:08
Қараулар: 142
АУЫЛ ТАЗАЛЫҒЫ – БАРШАҒА ОРТАҚ МІНДЕТ

АУЫЛ ТАЗАЛЫҒЫ – БАРШАҒА ОРТАҚ МІНДЕТ

 

Өткен аптаның сенбісінде дәстүрлі күзгі тазалық шаралары ұйымдастырылып, әр мекеме қызметкерлері  ауыл маңын күл-қоқыстан арылтуға өз үлестерін қосты. Бұл жолы сенбілікке 200-ге жуық мекеме қызметкері, бір жүктемелі трактор мен жүк көлігі тартылды.

Әттегенайы, қоршаған ортаның экологиялық-санитарлық  жағдайына немқұрайлы қарайтын тұрғындардың қатары артпаса, сиремей тұр. Өйткені, Ұңғысын және далалық ойындар өтетін жерлер біртіндеп  күл-қоқыс төгілетін полигонға айналып барады. Әр түрлі тұрмыстық заттардың қалдығы, қауырсын құтылар, бөтелкелер, өлген малдың терісі т.б бәрі осы маңға бей-берекетсіз төгіле бергендіктен кәдімгідей күлтөмпешіктерге айнала бастапты. Қоқыс алаңы —  қауіпті жұқпалардың ошағы екенін білсе де, кей сайқындықтар бұл мәселеге аса бас ауырта қоймайтын секілді.

– Ауыл тұрғындары тазалық мәселесіне салғырт қарайды. Қоқыстарды арнайы полигонға емес,  осы маңға төге салады. Туған өлкесінің тазалығына бей-жай қарайтындардың кесірінен ауылдың маңы ластанып, қосалқы полигонға айналып кете ме деп уайымдаймын,-дейді ауыл әкімі Нұргүл Омарова.

Айта кетелік, сенбілік барысында 4 тоннадан астам қоқыс шығарылды.

Арайлым ЕСМАҒҰЛОВА